مناضل حزب العلفان دينصور يبني ويطلّع فالبنيان
يحب الجدال وأبو نواس مع شوية قصبة وزوج كيسان
عندها زوج معاني ولحديث قياس يا العربان
تلقاه كل سمانة في الجزيرة، مرة شيتا ومرة فتّان
عنده غنايا وحدة يبرّح فيها في خاطر العديان
أنا ما نحشمش وكيما يقولوا اخرج لربّي عريان
أنا أتشرّف بانتمائي للأفلان
ونعرف من زمان ندير البوليتيك في كل مكان
بوتفليقة دزولنا ربّي باش يدّينا لبرّ الأمان
ولي يقولّي ورّاه لمان؟ نقولّو معزة ولو طارت يا إخوان
ولي يقول لبلاد مايش مليحا نهبّلو بالصماطة واخزي الشيطان
ولّي يسقسيني على البرلمان
نقولو راو يدافع على مصالح المواطن الحيران
ولي يقولّي بلّي راهم في الشيراتون يشويو فلخرفان
نقولو ها واش بغيت يموتوا بالشر ولّا ياكلوا غير البنان
ولي يقلّي راهم مرّقوها ولّاو يجيبوا العايلة في مرسداس طايوان
نلعبها نصايد في الذبان
ولي يقولي لا جوناس قاع يبيعوا في الشمّة والدخان
نقولّو يا حبيبي نتا عايش فالغربة وما تعرفش واش كان
غير انتا رحت ولبلاد ولات اوتوروت وسوبر مارشي وزينت البلدان
ولّي يقول لي بلادنا راهي في يد الجنرال فلان
نقولّو تحبس ثم يا عدو لبلاد يا عميل فرنسا والماريكان
ولّي يحكي على المجازر نقولّو يا خويا الشعب كره من الإشاعات وهدرة القهاوي والجرنان
ولّي يهدر من المعارضة نقولّو سطوب، جزاير ما هي مصر ولا تونس ولا السودان
وينعل بو الثورات العربية اللي عاد فيها حبيبي القذافي يقتل ويهان

غاني مهدي
15 جانفي 2012