شعبي العريان يموت عليا
نكلخلو كيما نحب، والله مسكين نيا
عمرتلو راسو شوييا بشوييا
سندروم ستوكهولم… ولّا يموت عليا
قلشتو بالفريق الوطني وهبطلو سروالو
فوتا عليا ثلاث مرات وما ربح والو
قتلو أنت حمار تموت على البالو
صفّق عليا بلا ما علابالو
واليوم ما يسالني ما نسالو

فقرتو وزتّلو في الزيت والسكر
وكلما خرج يندب كلا الضرب من لا بوليس والعسكر
ساكت كالعڤون، شاف خير ولّا منكر
هذا ماوش شعب هذا قطيع نعاج الله يستر

شعب عايش بالتمني والأحلام
يموت على حفلات الراي وأفلام عادل إمام
بعثتلو كل شيء كريدي وقتلتو بالتخمام
وكل ما تزاڤات، نڤولو سيري السنتورة وإلى الأمام

شعب بلا ماضي ولا مستقبل
نصّو حرڤ في فلوكة والباقي راح يهبل
يخّي ڤلتلكم نهار جيت في اليوم الأول
لوكان صرالي وش صرالكم راني طلعت للجبل

غاني مهدي
19 جوان 2011

اترك تعليقا