زيد فالقهوة زيد فالزيت
زيد حتى فالزلميت
زيد فالڤاز زيد فالماء
بيعنّا حتى لهوا
زيد فالفستى زيد فالكذب
وأبنينّا جامع بالذهب
كلّخنا كل رَبْع سنين
بأيها الشعب المسكين
الله غالب، علينا الدين
أنتايا أدّي لملاير، وأفطر
الصباح بالفطاير
والزوفري في حياتو حاير…
مالڤى بيها وين
زيد في الحڤرة زيد في الذل
أحنايا شعب مبهدل…
وين الهربة وين
رڤدنا باليتيمة
فيلم هند في السينما
وثرنا بالعزيمة
كل صباح بتبسيمة
رانا متفاهمين…

لاجوناس عايشة بالزطلة
والحكومة راهي في عطلة
الطلبة ماتوا بالشر
والمينستر راهو يسكر
ويا لطيف، الله يستر…
وين الهربة وين
الجامعة راهي خلات
دراهم الماكلة ولّاو فيلات
للأصحاب والخليلات…
وين الهربة وين

لي أنجانيور ولاو حراڤا
بابور غرق أولا مالاڤا
الخدمة لمن أطاع
واللحم على من استطاع
في الشوماج بلادي خلاني
حتى الموت ولا مجاني
بفلوكا وجبس تيواني
ڤاني تربح ڤبر إسباني…
وين الهربة وين

كل مرة نعاودو من جديد
الشعب كره النشيد…
تاع الثورة والشهيد
والباقي مع البارصا ومدريد
كي يربحوا نديروا عيد…
وين الهربة وين

زيد فالقهوة زيد فالزيت
زيد حتى فالزلميت

رايسنا ولّى فرعون
يحب الكرسي كالمجنون
الشعب يقُلّو أنت شكون
وهو معرّس في الهلتون
يا سيدي الله يهديك
رانا فقنا بالتكنيك
روح أخطينا يرحم والديك
الجزاير واعرا عليك

زيد فالقهوة زيد فالزيت
زيد حتى فالزلميت

يا شعبي نوصيك
لبوليتيك واعرا أخطيك
وإذا دخلت تحشو رجليك

زيد فالقهوة زيد فالزيت
زيد حتى فالزلميت…

غاني مهدي
4 ماي 2011

اترك تعليقا